Ունայնիկներ

եթե
մեծամասամբ
ես կարճ եմ գրում
ապա կարող եմ ինձ արտոնել նաև
երկար գրել

*
քանի որ
գրականությամբ չեմ վաստակում
գրականությունն էլ
ինձ և ինձպեսներին
հազվադեպ կվաստակի

*

եթե
հայրենական արտադրության
բանաստեղծություն գրողները
ինձ պես են մտածում և զգում
որ իրենք բացառիկ երևույթ են
որ իրենց գիրը կհարատևի դարեր
ապա ես կարող եմ
արտոնել ինձ
այդպես չմտածել

*

եթե
արդեն չափանիշ է
որ իրավ բանաստեղծը
պետք է հազար ու մի լեզվով թարգմանվի
և շարունակ մրցանակներ ստանա
ապա ես կիսատ-պռատ բանաստեղծ եմ

*

բանաստեղծական մտահղացումներս
իրար հրմշտում
ժամ առաջ ուզում են
մարմին հագնել

ես ինձ
կարող եմ թույլ տալ
ստեղծագործական
արդյունավետ ծուլություն

*

սեպտեմբերյան մի գիշեր
հասկացա
որ թեպտև ողջ
բայց վաղուց մեռած եմ

ահա
մի քանի տարի էլ
գարնանը
սիրտս վարդի պես չի բացվում
և մարմինս չի լսում
մոտեցող աշնան
ոտնաձայները

հնարավոր է
ես ամեն օր
կամաց-կամաց մահացել էի
իմ անաստված առօրյայից
հարազատ քաղաքում
տանը
աշխատատեղում բանտված լինելու զգացողությունից

բացառված չէ նաև
որ աղքատությունը
դժվարությամբ մարվող վարկերը
և չնչին պարտքերը
ինձ մի քիչ սպանեցին

գուցեև
ալկահոլը ծխախոտը
քայքայվող լյարդս
և մազաթափվող ցայլքս
դանդաղորեն սպանեցին ինձ

ենթադրելի է
որ հայրենիքիս
արդեն ժամանակավոր իշխանությունը
ինձ սպանեց
նա մեռցնելու
հազար ու մի հնար գիտի

որոշակիորեն
հստակ
չեմ կարող ասել
թե ով կամ ինչը ինձ սպանեց

*

հոկտեմբերի լուսաբացներին
կռահեցի
որ մեջքի ցավը կարող է մուսա լինել
բայց չհասկացա
հոկտեմբերը մե՞ղր է
թե ընկույզ

*

անձրևների կեղեքումից առաջ
պայծառակերպությունը նոյեմբերի
թիթեռ է
որ գորովանքով
հանդարտորեն իջել է դեմքիս